SHULE ZAAGIZWA KULIMA ANGALAU HEKA 10.

Imetumwa : November 28th, 2023

Mkuu wa Wilaya ya Kiteto, SSI. Mbaraka Alhaji Batenga, ameagiza kila shule ya sekondari  na msingi wilayani hapo kulima angalau heka kumi  ili kuwapunguzia wazazi gharama ya kuchangia chakula shuleni.  

Hayo ameyaongea katika kikao cha Kamati ya Ushauri ya Wilaya (DCC) wilayani hapo kilichofanyika Novemba 27,2023.

Katika kukabiliana na tatizo la lishe nchini, serikali iliamua wanafunzi wote lazma wale  angalau mlo mmoja shuleni. Kutokana na agizo hilo kila mzazi anawajibika kuchangia chakula shuleni.

Mkuu wa Wilaya amesema endapo kila shule watalima angalau heka kumi, mazao yatakayopatikana yatatumika kama sehemu ya chakula hivyo itawapunguzia  wazazi mzigo wa kuchangia chakula.

“Na ili kilimo kiwe chenye tija, ni lazma kuacha kilimo cha mazoea, ni lazma sasa wafuate kanuni bora za kilimo ikiwemo kulima kwa wakati, kupanda kwa wakati, matumizi ya mbegu bora; matumizi  sahihi ya mbolea na kupalilia kwa wakati” amesema Mh. Batenga.

Mkuu huyo wa Wilaya aliongeza kwa kusema matumizi ya mbolea si lazma iwe mbolea ya dukani bali hata samadi inaweza kuongeza uzalishaji wa mazao.

Katika hatua nyingine, Kaimu Mkuu wa Idara ya Kilimo na Mifugo, Ndugu Said Sembade, aliiambia Kamati hiyo kua Kampuni ya Minjingu imeahidi kutoa mbolea tani  2 kwa shule 10 za msingi na shule 10 za sekondari.

“Mashamba katika shule hizo zitakazopokea mbolea, yatatumika kama mashamba madarasa. Lengo la utoaji wa mbolea kwenye shule hizo ni kuongeza uzalishaji na tija ili shule ziweze kukeleza agizo la lishe kwa wanafunzi”, aliongeza Sembade.