Halmashauri ya wilaya ya Kiteto yajenga uzio wa hospitali ya wilaya

Imetumwa : October 9th, 2017

                                                                                                                                                                                                                                                                                                                                                                                                                                                                                                                                                                                  Uzio wa hospitali ya wilaya ya Kiteto  unaojengwa na halmashauri ya wilaya ya Kiteto unavyoonekana pande zote

                                                                 Halmashauri ya wilaya ya Kiteto yajenga uzio wa hospitali ya wilaya

Halmashauri ya wilaya ya kiteto inajenga uzio wa hospitali ya wilaya.Uzio huo ambao  kwa kiasi kikubwa uko katika hatua za mwisho,unajengwa kwa kutumia mapato ya ndani ya halmashauri .

Mganga mkuu wa hospitali ya wilaya ya Kiteto  daktari Ramadhani Maingu amesema kwamba uzio huo utakapokamilika  utaimarisha ulinzi katika eneo la hospitali kwani kwa hali ilivyo sasa watu wamekuwa wakiingia na kutoka eneo la hospitali kwa kupitia maeneo yaliyo wazi , hivyo kuhatarisha usalama wa mali za hospitali na kuleta usumbufu kwa watumishi wa hospitali hiyo wakati wakitekeleza majukumu yao. Pia  baadhi ya wagonjwa  wamekuwa wakitoroka  hospitali kwa kupitia maeneo hayo .

Aidha Katibu wa afya wa  wilaya ya  Kiteto ndugu Dia Ally  amesema kwamba  uzio huo wa hospitali ni muhimu sana katika kudhibiti maambukizi kwani bila ya kuwa na uzio wanyama kama mbwa wanakuchukua taka hatarishi na kuzipeleka kwenye makazi ya watu jambo ambalo linaweza kusababisha maambukizi ya magonjwa.Kadhalika watoto wanaokota taka hizo,hali ambayo ni hatari kwani inaweza  kuwasababishia maambukizi ya magonjwa. Vilevile  Katibu  wa afya wa wilaya amesema kwamba uzio huo utasaidia katika kudhibiti watu kuingia maeneo ya hospitali nje ya muda maalumu uliowekwa, kwani  watu wanaokuja kuangalia wagonjwa wanatakiwa kuingia hospitali kwa muda maalum ili kutoa nafasi  kwa watumishi kuweza kutekeleza majukumu yao  kwa utulivu.

Nao Wauguzi  wa hospitali ya wilaya ya Kiteto walipohojiwa kwa nyakati tofauti wamesema kwamba wamefurahishwa sana na ujenzi wa uzio huo, kwani utakapokamilika utasaidia kuondoa usumbufu wa ndugu na jamaa ambao wamekuwa wakiingia wodini kuwaona wagonjwa  katika muda usioruhusiwa kwa kupitia  maeneo yasiyokuwa na uzio.Pia kukamilika kwa uzio huo kutaongeza usalama wa vifaa vya hospitali hiyo.

Katika hatua nyingine walinzi wa hospitali hiyo wamesema kwamba wanashukuru sana kwa ujenzi wa uzio huo kwani utakapokamilika  utasaidia kuondoa adha wanayoipata sasa ya watu kuingia katika maeneo ya hospitali bila utaratibu hususani nyakati za usiku, jambo ambalo linahatarisha usalama wa wagonjwa na mali za hospitali na linaleta usumbufu mkubwa sana kwa wagonjwa na  kwao pia.

Ujenzi huo ambao unaendelea kwa kasi kubwa, mpaka sasa umegharimu  kiasi cha shilingi milioni ishirini na laki tano(2,500,000).Hata hivyo ujenzi wa Uzio  huo pamoja na miradi mingine inayoendelea kutekelezwa wilayani Kiteto inatokana na jitihada za Mkurugenzi mtendaji wa halmashauri ya wilaya ya Kiteto ndugu Tamimu Kambona ambaye amedhamiria kuleta maendeleo ya kweli wilayani kiteto akishirikiana na wakuu wa idara za halmashauri ya wilaya ya Kiteto .