KATA YA BWAWANI YAPATA MRADI WA SHULE MPYA YA ELIMU MSINGI.

Imetumwa : July 28th, 2025

Mkuu wa Wilaya ya Kiteto Mhe. Remidius Mwema Emmanuel Julai 23,2025 ameongoza mkutano wa hadhara katika Kata ya Bwawani kwa lengo la kuutambulisha rasmi mradi mkubwa wa ujenzi wa shule mpya ya elimu msingi katika Kitongoji cha Mji Mpya.

Mradi huo una thamani ya shilingi milioni 330.7 na unatekelezwa kwa fedha kutoka Serikali Kuu kupitia programu ya BOOST ikiwa ni sehemu ya mkakati wa kuboresha miundombinu ya Elimu Awali na Msingi na kuhakikisha  mazingira rafiki  ya kujifunzia na kufundishia.

Ujenzi huo utahusisha miundombinu muhimu ya shule ikiwa ni pamoja na: Madarasa sita (06) ya elimu ya msingi, madarasa mawili 02) ya mfano kwa elimu ya awali, matundu ya vyoo sita (06) kwa wanafunzi wa elimu ya msingi na matundu sita(06) ya vyoo kwa wanafunzi wa awali. 

Aidha, ujenzi huo utahusisha vyoo matundu mawili (02) kwa walimu pamoja na jengo moja la utawala.

Kukamilika kwa ujenzi wa shule hiyo mpya kunatarajiwa  kutapunguza adha ya watoto kutembea umbali mrefu kutafuta elimu na kuongeza mahudhurio shuleni na pia utapunguza msongamano katika shule ya Msingi Bwawani.