Madiwani Waaswa Kusimamia Amani katika Maeneo yao

Imetumwa : July 7th, 2018

Madiwani wa halmashauri ya wilaya ya Kiteto  wakiendelea na kikao cha baraza ndani ya  ukumbi wa halmashauri.

.......... HABARI KAMILI............

Madiwani wa  Halmashauri ya wilaya ya Kiteto  wameaswa  kuwasimamia watendaji wa kata na vijiji katika maeneo yao ili   kumaliza migogoro. Rai hiyo imetolewa na Mkuu wa wilaya ya Kiteto Mhe. Tumaini Magessa wakati  akitoa maelekezo ya serikali katika  kikao cha baraza la madiwani , kilichofanyika katika ukumbi wa halmashauri , mwishoni mwa mwezi  Juni 2018.

Akizungumza katika kikao hicho Mhe. Magessa amesema “ Nawashukuru sana madiwani  mnaendelea kusimamia amani katika maeneo yenu. Sasa tunaelekea mahali Fulani ambapo pana matumaini. Kila kijiji mtakachopita  waulizeni watendaji daftari lao la migogoro liko wapi?Mkiendelea kuwasimamia hao migogoro itakwisha.Katika uchunguzi wetu tumebaini kwamba  kule chini watendaji wa kata na vijiji walifika mahali wakaacha  kushugulikia migogoro, kwa hiyo akabakia diwani, DED,DC,RAS na mawaziri .Ndio wanaoshughulikia migogoro ya vijiji,sasa matokeo yake yalikuwa magumu kidogo”

Aidha Mhe. Magessa amesema kwamba kama waheshimiwa madiwani wataendelea kuwasimamia  watendaji  kufanya kazi zao,migogoro iliyobaki wataendelea kuimaliza.

Wilaya ya Kiteto imekuwa ikikumbwa  na migogoro mingi ya ardhi, ambapo viongozi wa vijiji,kata, wilaya ,mkoa na hata taifa wameendelea kushughulika kumaliza migogoro hiyo. Hadi sasa iko katika hatua nzuri, hali ya amani na utulivu imerejea  kwa kiasi kikubwa ndani ya wilaya hiyo.

.......... MWISHO..........