Mkuu wa Mkoa wa Manyara Aagiza Kuvunjwa kwa Makazi Holela Wilayani Kiteto

Imetumwa : January 16th, 2018

                           Mbunge wa jimbo la Kiteto Mhe. Emmanuel Papian,Mwenyekiti wa Halmashauri  Mhe. Lairumbe Mollel , Mkurugenzi Mtendaji wa Halmashauri  ndugu Tamim Kambona , Kamati ya Ulinzi na usalama, viongozi wa kijiji ( Waliokaa kwenye viti)  pamoja na wakazi wa kijiji cha Kimana kata ya Partimbo wilayani Kiteto wakimsikiliza Mkuu wa Mkoa wa Manyara Mhe. Alexander Mnyeti alipokuwa akizungumza na  wakazi hao  katika mkutano wa hadhara uliofanyika kijijini hapo.

                          Wakazi wa kijiji cha Kimana kata ya Partimbo wilayani Kiteto wakimsikiliza Mkuu wa Mkoa wa Manyara Mhe. Alexander Mnyeti alipokuwa akizungumza nao katika mkutano wa hadhara uliofanyika kijijini hapo.

.......HABARI KAMILI......

Mkuu wa Mkoa wa Manyara Aagiza Kuvunjwa kwa  Makazi holela  Wilayani Kiteto

Mkuu wa mkoa wa Manyara Mheshimiwa Alexander Mnyeti ameagiza kuvunywa kwa makazi holela yaliyojengwa katika kata ya Partimbo.Na wamiliki wa makazi hayo kuhamia katika kijiji cha Kimana,ambacho ni kijiji halali . Mhe. Mnyeti ametoa agizo hilo  katika mkutano wa hadhara uliofanyika katika kijiji cha Kimana kilichopo kata ya Partimbo wilayani Kiteto.

Akizungumza wakati anatoa agizo hilo Mhe. Mnyeti anasema “Mkuu wa wilaya nakuagiza, hakikisha unasafisha barabara yote, kote kwenye makazi holela.warudishe hapa,wakae hapa,na mji huu utakuwa mkubwa sana.Maana taarifa niliyonayo nimeambiwa wako watu hapa wanasubiri msimu wa kilimo wanakuja kulima na kuondoka.Kama huwezi kuishi nenda kwenu kaishi. Manyara sio sehemu ya kuchezea,Mnakuja kulima,baada ya mavuno mnawaachia watu takataka mnaondoka.Nataka nijue kama hiki ni kijiji,kitongoji au ni kitu gani.Nataka nikirudi  hapa nikute watu wote wamehamia kwenye kijiji hiki, na ulinzi na usalama uimarishwe na watu waishi kwa amani”.

Mheshimiwa Mnyeti pia amemtaka  Mkuu wa wilaya ya Kiteto Mheshimiwa Tumaini Magessa kusimamia kazi hiyo ya uvunjaji wa makazi  holela ,na ametoa mwezi mmoja kukamilika kwa kazi hiyo, ambapo amemtaka Mhe. Magessa kumpa taarifa ya namna alivyotekeleza maagizo hayo,mara  baada ya muda huo .

Katika hatua nyingine Mhe. Mnyeti  amewapongeza wakazi wa kijiji cha Kimana kwa kuheshimu mpango wa matumizi bora ya ardhi  .Wakati huo huo ametoa onyo kali kwa  wakazi wa kijiji hicho ambao hawaheshimu mpango wa matumizi bora ya ardhi na wavamizi wa mashamba ya watu kwamba  waache  mara moja kulima kwenye maeneo ambayo sio mashamba, kwani kufanya hivyo  ni kuchochea  migogoro . Mhe. Mnyeti anasema “Ukianzisha shamba jipya ambalo haliko kwenye utaratibu unatafuta ugomvi.Hatutaki kugombana.Mnapaswa mkalime kwenye maeneo ambayo mmekubaliana. Na waliovamia mashamba yasiyo ya kwao waondoke mara moja”.Mheshimiwa Mnyeti amewaambia wananchi hao kwamba wasiende kulima mashamba ambayo hawajui wamiliki wake.na ambayo hawajui wameyapataje kwani kufanya hivyo ndiko kunakosababisha migogoro.Hapa Mhe. Mnyeti anasema ‘‘Unakwenda kwenye shamba ambalo mwenyewe humjui, unaingiza trekta unalima.mwenyewe akija kesho mnapigana mikuki. Sasa hao wanaosababisha chokochoko  sitaki kusikia habari hii tena”.

Kata ya Partimbo ndio kata ambayo eneo lake kubwa limevamiwa na watu na kujengwa makazi holela.Makazi hayo ambayo yako nje ya utaratibu  yanasababisha wakazi wa maeneo hayo kukosa huduma muhimu kama shule, zahanati ,maji na umeme.

                                                                                                         ................. MWISHO................