SIDO Waendesha Warsha Kuhamasisha Mkakati wa Uanzishwaji na Uendelezaji wa Viwanda kwa Njia ya Kongano Mkoani Manyara Wilayani Kiteto Tarehe 04.07.2017

Imetumwa : July 10th, 2017

Bw. Sempeho Manongi ( Meneja wa SIDO mkoa wa Manyara) akitoa ufafanuzi  kuhusu Mkakati wa  uanzishwaji na uendelezwaji Kongano  wilayani Kiteto.

Mkuu wa wilaya ya Kiteto Mh. Tumaini Magessa  akifungua warsha ya Mkakati wa Uanzishwaji na uendelezwaji Kongano iliyoandaliwa na SIDO mkoa wa Manyara.

Kaimu mkurugenzi  mtendaji wa halmashauri ya wilaya ya Kiteto Bw. Rafael Makoninde  akizungumza katika warsha ya Mkakati wa Uanzishwaji na uendelezwaji Kongano iliyoandaliwa na SIDO mkoa wa Manyara.

Wataalamu wa halmashauri ya wilaya ya Kiteto wakisikiliza kwa makini maelekezo katika warsha ya Mkakati wa Uanzishwaji na uendelezwaji Kongano iliyoandaliwa na SIDO mkoa wa Manyara .

Habari kamili

SIDO Mkoa wa Manyara  Waendesha Warsha  Kuhamasisha Mkakati wa Uanzishwaji wa Viwanda kwa  Kutumia Dhana ya Kongano Wilayani Kiteto.
 SIDO mkoa wa Manyara  wameendesha warsha ya kuhamasisha mkakati wa uanzishwaji wa viwanda  vya Kongano. Warsha hiyo imefanyika katika  ukumbi wa Halmashauri ya Wilaya ya kiteto ikiwahusisha Mkuu wa wilaya ya Kiteto, kaimu mkurugenzi mtendaji wa halmashauri ya wilaya ya Kiteto na wataalamu wa halmashauri ya wilaya ya Kiteto.

Mwezeshaji katika warsha hiyo meneja wa SIDO mkoa wa Manyara bwana Sempeho Manongi amesema kwamba  ili uanzishwaji viwanda kwa kutumia dhana ya uendelezaji Kongano uweze kufanikiwa katika wilaya ya Kiteto halmashauri ya wilaya inatakiwa kuainisha  rasilimali zilizopo, rasilimali hizo      zitumike  kuanzisha viwanda  vidogo. Hata hivyo bwana   Manongi amesema kwamba ili rasilimali hizo ziweze kuwa fursa na wajasiliamali waweze kuzitumia kuanzisha viwanda, ni lazima  halmashauri  iweke mazingira wezeshi ambapo  uanzishwaji na uendelezwaji wa kongano za viwanda  utawezekana. Halmashauri zinatakiwa kutenga  maeneo ya kutosha , pia kwa kutumia wataalamu wake, halmashauri ifanye  juhudi  katika kujenga uelewa kwa wananchi, hii ikiwa   ni pamoja na uwasilishwaji wa mkakati wa SIDO na uundwaji wa kamati  ya  wilaya ambayo  itakuwa  mahususi kwa ajili ya  kuwaunganisha walengwa wa Kongano  na wataalamu  wilayani Kiteto.

 Serikali ya awamu ya tano imeweka msisitizo katika  kuhamasisha uanzishwaji  na uendelezwaji wa viwanda.Wadau muhimu ; wazalishaji wa malighafi, wasambazaji, wafanyabiashara, wasafirishaji, wanunuzi na wauzaji  wajengewe  uelewa  wa dhana  ya Kongano  za viwanda zinazojikita katika rasilimali zilizochaguliwa wilayani ambazo zitaendelezwa kwa ushirikiano kati ya wataalamu kutoka katika  halmashauri ya wilaya na wadau hao  kwa kutumia dhana ya mnyororo wa thamani. Dhana ya uendelezaji Kongano haihitaji kuanza  mambo mapya, rasilimali zinazopatikana katika wilaya  zinatumika kama fursa za uanzishaji  viwanda. SIDO  kama msimamizi wa maendeleo ya viwanda vidogo vidogo  Tanzania wanatoa huduma ya kuhamasisha uwekezaji katika sekta ya  viwanda vidogo na biashara ndogo kulingana na fursa zilizopo, wanatoa huduma ya mafunzo, huduma ya teknolojia, msaada wa masoko , na ndio wenye jukumu la kuhamasisha  halmashauri kutenga maeneo kwa ajili ya uanzishwaji wa Kongano.

Aidha dhana ya Kongano ni muhimu sana katika uendelezaji  viwanda kwani  Kongano za viwanda zinasaidia katika kurahisisha mawasiliano na taarifa, kupata teknolojia, kuongeza ujuzi, kuongeza uwezo wa kuzalisha, ushirikiano, kupata masoko, kupata huduma wezeshi kirahisi kama vile huduma za kudhibiti ubora na viwango  kutoka katika taasisi kama vile TBS na TFDA na pia kurahisisha uwezeshaji kupitia serikali au wahisani. Hivyo kwa kuzingatia jografia ya  wilaya  ya Kiteto, hususani mji wa Kibaya ambao  unakua kwa kasi, pia ni njia panda ya kuelekea miji mingine  kama Dodoma, Dar es Dalaam, Babati na Tanga , ni soko la wakulima na bado una fursa ya kupangwa. Uanzishwaji wa viwanda  vidogo  vya kusindika mazao ya kilimo na mifugo,Kuzalisha bidhaa za ngozi, kuzalisha vyuma,  kuzalisha  samani, matengenezo ya magari na uwekezaji katika  vyuo vya ufundi, utakuwa na mafanikio makubwa sana.

“ KONGANO’’  ni mkusanyiko wa viwanda vilivyo karibu karibu  vinavyofanya shughuli zinazofanana  au kushabihiana vikisaidiwa na watoa huduma mbalimbali wanaolenga shughuli za kongano husika.