WAKULIMA WAELIMISHWE UMUHIMU WA KUPIMA AFYA YA UDONGO

Imetumwa : February 18th, 2024

Mwenyekiti wa Kamati ya Huduma za Uchumi , Diwani Mussa Braiton,  ametoa rai kwa watumishi wa Idara ya Kilimo, Mifugo na Uvuvi,  kuwajulisha wananchi kuhusu uwepo wa huduma ya upimaji wa afya ya udongo.

Hayo ameyasema katika Kikao  Cha Robo ya Pili cha Kamati ya Huduma za Uchumi  kilichofanyika Februari 16, 2024 katika Ukumbi wa Halmashauri.

Diwani Braiton amesema kwamba serikali imeleta kifaa cha kupimia afya ya udongo na pia imewawezesha Maafisa Ugani   pikipiki ili kurahisha zoezi hilo,  hivyo wananchi wanapaswa wajue upatikanaji wa huduma hiyo.

“Wananchi wajulishwe na wapewe elimu kuhusu upimaji wa afya ya udongo” aliongeza Diwani Braiton.

Nae Mwenyekiti wa Halmashauri, Mh. Abdala Bundala, amesisitiza kwamba jambo la kupima afya ya udongo lichukuliwe kwa umuhimu mkubwa  ili kuweza kuongeza  uzalishaji haswa katika kipindi hiki ambacho  uzalishaji unashuka.

Huduma ya upimaji wa afya ya udongo hutolewa bure na ili mwananchi aweze kupimiwa afya ya udongo katika shamba lake, anapaswa kupeleka ombi lake kwa Afisa Ugani kisha Afisa huyo ataenda kwenye shamba la mkulima na kuchukua sampuli ya udongo na kwenda kuipima  katika maabara iliyopo katika Ofisi za Idara ya Kilimo Kiteto.

Baada ya majibu ya afya ya udongo kutoka, mkulima anashauriwa  aina sahihi ya mbolea ya kutumia ili kurutubisha ardhi ya shamba lake.

Toka Halmashauri ipokee kifaa cha kupimia udongo  Agosti 2023, jumla ya sampuli 312 za udongo kutoka katika vijiji  15 vilivyopo katika kata za Bwawani, Matui, Chapakazi, Ndirigishi, Olboroti, Njoro na Partimbo zimepimwa afya yake na ushauri stahiki wa matumizi ya ardhi hizo umetolewa kulingana na majibu ya afya ya udongo katika vijiji husika.