"Watendaji wa Vijiji Tekelezeni Majukumu Yenu Migogoro Isiendelee Kuichafua Wilaya ya Kiteto ’’ DC Magessa

Imetumwa : February 26th, 2018

Mwenyekiti wa  Kikao cha DCC  Mhe. Tumaini Magessa akizungumza  wakati wa Kikao cha DCC kilichofanyika katika ukumbi wa halmashauri ya wilaya ya Kiteto.

Wajumbe wa Kikao cha DCC wakiwa katika  Kikao hicho kilichofanyika katika ukumbi wa halmashauri ya wilaya ya Kiteto.

 Wajumbe wa Kikao cha DCC wakishauri juu ya masuala mbalimbali yanayohusu wilaya ya Kiteto wakati wa Kikao cha DCC kilichofanyika katika ukumbi wa halmashauri.

                                      Mchungaji wa Kanisa la Kiinjili  la Kilutheri Tanzania usharika wa Kibaya akifanya sala baada ya mwenyekiti kufunga kikao cha DCC kilichofanyika katika ukumbi wa Halmashauri ya wilaya ya Kiteto

....................HABARI KAMILI......................

"Watendaji  wa Vijiji Tekelezeni Majukumu  Yenu Migogoro Isiendelee kuichafua Wilaya ya Kiteto ’’ DC Magessa

Mkuu wa wilaya ya Kiteto Mheshimiwa Tumaini Magessa amewataka watendaji wa vijiji wilayani Kiteto kutekeleza majukumu yao ili kumaliza migogoro inayotokea katika vijiji vyao .Mhe. Magessa ameyasema  hayo wakati akifungua kikao cha Kamati ya Ushauri ya  Wilaya ( DCC) kilichofanyika katika ukumbi wa halmashauri.

Mheshimiwa Magessa amesema  kwamba migogoro  yote inayoendelea wilayani Kiteto inawezekana kwisha kabla ya kufika ofisini kwake ikiwa watendaji wa vijiji watafanya kazi zao kama inavyotakiwa, kwa sababu wao ndio wanaoishi na wananchi ,wanatakiwa kuigundua migogoro inayotokea katika vijiji vyao na kuishughulikia ili kuitatua .Akitoa maelekezo kwa  watendaji wa vijiji kuhusu namna  ya kushughulikia migogoro hiyo Mhe. Magessa anasema ‘‘kila mtendaji awe na  rejista ya migogoro, inayoonyesha migogoro yote , na nini  kijiji kimefanya juu ya migogoro hiyo. Atuambie mimi nimetatua  moja, mbili , nimeshindwa hapa.Tunapata shida sana  kwa sababu huko katika  ngazi ya vijiji watu hawafanyi kazi ,mambo ya uongo yanafika huku DC ndiye ninayekuja kuyagundua.Watu wanakuja na migogoro na uongo mwingi.Ukisinzia kidogo uongo huo unapita’’.

Aidha  Mhe. Magessa amesema  kwamba kuna kazi  kubwa sana  ya kufanya ili mambo yaende na yaishie katika ngazi za vijiji.Kazi hiyo ni kuwafanya watendaji wawajibike ipasavyo. Akisisitiza kuhusu uwajibikaji kwa watendaji wa vijiji,Mhe. Magessa anasema “Watendaji  wa vijiji fanyeni  kazi, migogoro ikifika katika ofisi zenu za vijiji, ishughulikiwe hapo, iishe  isiendelee kuichafua wilaya yetu”. Kadhalika Mhe. Magessa amesema kwamba watendaji wakifanya kazi,  migogoro mingi itashughulikiwa  katika ngazi za vijiji na vitongoji na ikifika katika ngazi ya wilaya ,utatuzi wake utakuwa umekamilika. Na kwamba ni kwa namna hiyo tu  ndio watafanikiwa kumaliza migogoro wilayani Kiteto.

.................... MWISHO ......................