ZAIDI YA BILIONI 1.8 ZA BOOST KUBORESHA MIUNDOMBINU YA ELIMU KITETO: DC MWEMA ASISISTIZA UWAJIBIKAJI

Imetumwa : July 24th, 2025

Katika hatua inayodhihirisha dhamira ya Serikali ya Awamu ya Sita ya kuboresha elimu nchini, Mkuu wa Wilaya ya Kiteto, Mhe. Remidius Mwema Emmanuel, ameongoza kikao maalum cha kutambulisha miradi yenye thamani ya zaidi ya bilioni 1.8 kwaajili ya shule 11 wilayani hapa.

Akizungumza katika kikao hicho kilichofanyika Julai 24, 2025, Mhe. Mwema alisema fedha hizo za program.ya BOOST  kutoka Serikali Kuu chini ya uongozi wa Rais Dkt. Samia Suluhu Hassan, ni kielelezo cha upendo kwa wana Kiteto, na aliahidi  kusimamia utekelezaji wa miradi hiyo kwa umakini ili kuhakikisha miradi hiyo inakamilika kwa wakati na katika  ubora  wa hali ya juu. 

"Kwasababu miradi hii ina jicho la tatu, watu wote wanaohusika kwenye mifumo naomba msimamie vizuri, nasisitiza sana mkasimamie vizuri," alisema kwa msisitizo Mhe. Mwema.

Aliitaka  Ofisi ya Mkurugenzi Mtendaji kuweka mpango thabiti wa usimamizi, ukadiriaji sahihi wa vifaa. Vilevile kwa wasimamizi wa miradi ngazi ya chini aliwasisitiza kuwa makini na uteuzi wa wazabuni na mafundi. Alionya dhidi ya kuwatumia  wazabuni na mafundi wasio na uwezo, akisema mara nyingi wamekuwa chanzo cha ucheleweshaji wa miradi.

Katika kikao hicho, Afisa kutoka TAKUKURU, Ndg. EliBrighton Mmari  alisisitiza wajumbe wote kuwa waaminifu na waadilifu, akibainisha kuwa taasisi hiyo itasimama bega kwa bega na halmashauri kuhakikisha hakuna mianya ya rushwa katika utekelezaji wa miradi hiyo.

Kikao hicho kilihudhuriwa na wataalamu kutoka Ofisi ya Mkurugenzi Mtendaji, viongozi wa Chama na Serikali na watendaji wa vijiji na kata kutoka sehemu ambazo miradi hiyo itatekelezwa.

Fedha za kutekeleza miradi hiyo ambayo ni  shilingi 1,881,000,000  zimekwisha kuingizwa kwenye akaunti za shule hizo toka wiki ya kwanza ya Julai 2025.